Með breyttum áherslum í nýtingu orkuauðlinda og notkun á mismunandi eldsneyti má fara ólíkar leiðir í átt að sjálfbæru orkukerfi á Íslandi.

Í þessu verkefni verður þróað heildrænt kvikt kerfislíkan af íslenska orkukerfinu sem gerir kleift að framkvæma margþætta greiningu á orkukerfum og þróun þeirra með tilliti til sjálfbærni. Líkanið verður notað til að greina sviðsmyndir af ólíkum leiðum í átt að sjálfbærni sem og orkuöryggi. Til að meta áhrif ólíkra leiða verða skilgreindir og þróaðir mælikvarðar á sjálfbærni orkukerfa, ásamt því að margvíð ákvarðanagreining (MCDA) verður notuð til að draga fram mikilvægustu mælikvarðana og að velja ákjósanlegar leiðir til sjálfbærni.

Kvik kerfislíkön, mat sjálfbærnimælikvarða og margvíð ákvarðanagreining eru þekktar aðferðir á sviði sjálfbærnirannsókna. Hinsvegar hefur ekki komið fram heildstæður matsrammi sem samþættir þessar þrjár aðferðir til greiningar á leiðum til sjálfbærrar þróunar, líkt og stefnt er að í þessu verkefni. Þess að auki verður matsramminn nýttur í að setja upp praktískt greiningartæki sem hægt verður að nota til að taka ákvarðanir tengdum þróun orkukerfa.

Rannsóknarhópurinn samanstendur af fimm háskólum:

• Háskóla Íslands
• Háskólanum í Reykjavík
• NTNU í Noregi
• Utrecht háskóli
• MIT

Þar að auki taka þátt þrjár rannsóknarstofnanir: VTT í Finnlandi, IVL í Svíþjóð og Íslensk Nýorka.

Rannsóknarteymið mun smíða fyrsta heildræna kvika kerfislíkanið af orkukerfi sem metur áhrif og afleiðingar ólíkra leiða í átt að sjálfbærni.