Véla- og iðnaðarverkfræðistofa
Á Véla- og iðnaðarverkfræðistofu er unnið að rannsóknum á mörgun hagnýtum og fræðilegum sviðum.
Burðaþolsfræði
Meðal annarra áhersluatriða í rannsóknum má nefna sveiflufræði og hagnýtingu hennar við titrings- og bilanagreiningu á vélum og burðarvirkjum.
Þá hefur verið lögð áhersla á tæknilega hönnun og erfðafræðilega bestun. Einnig er unnið að rannsóknum á gervifótum og tengingum þeirra við mannslíkamann.
Tölfræði og stýritækni
Á tölfræðisviði hefur einkum verið unnið að ýmiss konar gagnaúrvinnslu og þróun líkana af ýmsum kerfum.
Enn fremur hafa verið þróaðar aðferðir til þess að meta kranavatnsnotkun í hitaveitukerfum út frá mælingum af heildarvatnsnotkun, til þess að fylgjast með streymismælum út frá þeim mælingum sem þeir gefa og hvernig fylgjast má með útfellingum í varmaskiptum.
Iðnaðarverkfræði
Í rannsóknum á sviði iðnaðarverkfræði hefur áhersla verið á gæðastjórnun og hagnýtingu aðgerðagreiningar við lausn ýmissa viðfangsefna í verkfræði og iðnaði.
Einnig eru stundaðar fræðilegar rannsóknir á þróun aðferðafræði á sviði aðgerðarannsókna.
Rannsóknarverkefni eru margvísleg og fela iðulega í sér þróun aðferða og hönnun kerfa til að bæta gæði og framleiðni með því að nýta betur tíma, peninga, hráefni, orku og önnur aðföng.
