Rannsóknarverkefnið byggir á tölvureikningum og tilraunum til að hanna, rækta, prófa og síðar endurbæta efnahvata fyrir rafefnafræðilega afoxun niturgass yfir í ammóníak við stofuhita og –þrýsting í vatnslausn.

Rannsókn byggð á tölvureikningum var nýlega gerð af umsóknaraðilum á efnahvötunarvirkni málmnítríða fyrir þetta efnahvarf. Áhugaverðar niðurstöður fengust þar sem nokkur nítríð voru álitin lofa góðu. Frekari rannsóknir verða gerðar með bæði tilraunum og reikningum til að skilja betur efnaferlið og hanna hagkvæmasta efnahvatann og hvarfaðstæðurnar til að á lokum sé hægt að mynda ammóníak rafefnafræðilega frá vatni og lofti.

Rannsóknarteymið er aðallega staðsett við Háskóla Íslands og við Nýsköpunarmiðstöð Íslands, en einnig við Ríkisháskóla Oregon fylkis. Teymið býr yfir bæði mikilli þekkingu og er með góða aðstöðu fyrir alla verkþætti verkefnisins.

Nýlega settu umsóknaraðilar upp aðstöðu til að framkvæma rafefnafræðilegar tilraunir til að hægt sé að staðfesta niðurstöður reikninganna. Fyrstu tilraunir lofa góðu og þetta öndvegisverkefni mun færa verkefnið yfir á næsta stig. Ítarlegir reikningar verða gerðir til að sannreyna og skilja betur fyrstu niðurstöðurnar með því að taka inn í reikningana aðrar kristalbyggingar, önnur yfirborð og fleiri hvarfganga.

Rannsókn á hraða efnahvarfanna verður framkvæmd til að skera úr um hvort einhverjir flöskuhálsar séu á hvarfleiðinni. Gæði efnahvatanna verður hámörkuð og næmar aðferðir í rafefnafræði og efnagreiningu verða settar upp.