Stofnerfðamengjafræði samhliða þróunar hjá Íslenskri bleikju

Nýleg og samhliða þróun býður upp á einstaka möguleika til að prófa stærstu spurningar þróunarfræðinar, um tengsl svipfars, erfða og umhverfis.

Með stórstígum framförum á sviði erfða- og lífupplýsingafræði hafa opnast nýir möguleikar á rannsóknu er tengja erfða-, þroskunar- og þróunarfræði. Meðal annars verður unnt að nota gríðarstór gagnasöfn um erfðamengi til að sannreyna lykiltilgátur um afbrigðamyndun og samhliða þróun í lítt rannsökuðum tegundum.

Bleikja nam land á Íslandi fyrir u.þ.b. 10,000 árum og hefur á þessum tíma myndað afbrigði í fjölda vatna og þannig sett á svið náttúrulega tilraun sem hentar afar vel til rannsókna er samþætta erfðafræðilegar undirstöður og stofnerfðafræði afbrigðamyndunar.

Rannsóknaverkefnið sem hér er sett fram byggir á því að nýta nýjustu tækni og aðferðir erfða- og lífupplýsingafræði til að finna erfðaset er tengjast hraðri þróun mismunandi bleikjuafbrigða hjá íslenskri bleikju. Við höfum þegar raðgreint umritunarmengi fóstra af mismunandi þroskaskeiðum en til þess að treysta þekkingu á sögu og erðalandfræði hinna marbreytilegu íslensku bleikjustofna munum við nota nýjar aðferðir sem skima allt erfðamengið.

ddRADseq getur greint gríðarlegan fjölda einbasa breytinga, sem við munum líka athuga hvort tengjast tilteknum afbrigðum. Einnig munum við prófa hvort fylgni sé við tilteknar vistfræðilegar sérhæfingar afbrigða og stofna.

Þessar rannsóknir færa okkur nær því að kanna hvort gen er tengjast tilteknum sérhæfingum séu undir áhrifum náttúrulegs vals eða þróist vegna dvínandi hreinsandi vals.